"ԵՐԻՏԱՍԱՐԴ ՆԿԱՐԻՉՆԵՐԻ ՑՈՒՑԱՀԱՆԴԵՍ", "Ազգ" օրաթերթ, 1998թ.
Արտասահմանյան երկրների հետ մշակութային կապերի հայկական ընկերության ցուցասրահում հերթական միջոցառումն էր: Այստեղ բացվեց երիտասարդ գեղանկարիչների աշխատանքների համատեղ-անհատական ցուցահանդեսը` նվիրված Եղեռնի զոհերի հիշատակին: Ցուցահանդեսի բացման առթիվ հեղինակներին շնորհավորեցին և նրանց ստեղծագործությունների մասին դրվատանքով խոսեցին ցուցահանդեսի հյուրեր Սոս Սարգսյանը, Ալեքսան Էքնոսյանը, Սարգիս Թերզյանը և այլոք: Նրանք մասնավորապես նշեցին, որ երիտասարդ նկարիչներն անկեղծորեն, գույնի և գծի նուրբ զգացողությամբ կտավին են փոխանցել իրենց մտորումները:
Սևադա Սարգսյանը Երևանի Խ. Աբովյանի անվան հայկական պետական մանկավարժական ինստիտուտի գեղարվեստական դաստիարակության ֆակուլտետի 5-րդ կուրսի ուսանող է, մասնակցել է մի շարք ցուցահանդեսների: Այս ցուցահանդեսում նա ներկայացրել է եկեղեցիների և դիմանկարների շարքեր, որտեղ զգացվում է ասելիքի և ինքնաարտահայտման ձևերի ու միջոցների ընտրության ազնվություն: Առկա է անհատականությունը:
|