"ՎԿԱՆ` ԱՍՏՂԵՐԸ", "Ավանգարդ" շաբաթաթերթ, 2001թ. թիվ 11
"Սևադա Սարգսյանի գեղանկարչությունը բավականին ինքնատիպ է իր գունագեղությամբ և ազգային ավանդույթներին իր մոտիկությամբ": ՀՀ ժողովրդական նկարիչ ՌՈՒԴՈԼՖ ԽԱՉԱՏՐՅԱՆ ... Ու նկարում էր նա, նկարում վաղուց, շատ վաղուց, բայց մուտքն արվեստի աշխարհ եղավ 1993թ.-ին: Սևադան սիրում է արևը, բնությունը, աշխարհի բոլոր գույներն ու... կյանքը: Նկարում է Սևադա Սարգսյանը հիմնականում երեկոյան, երբ հայոց երկնակամարում փայլատակում են աստղերը, որոնք էլ դառնում են նրա ամեն մի նոր ծնվող կտավի լուռ վկաները: Նկարելը երիտասարդ նկարչի համար զուտ աշխատանք չէ, այլ զգացմունքներն արտահայտելու միջոց: Մինչ օրս ունեցել է չորս անհատական ցուցահանդեսներ և մասնակցել բազմաթիվ հանրապետական ու միջազգային ցուցահանդեսների, մրցույթների, արժանացել մրցանակների: "Զոհաբերում", "Դիմակահանդես", "Ձուկ և կարմիր կակտուս", "Բոլերո"... Ստեղծագործություններ, որոնք արտահայտում են հայ մարդու խոհերն ու երազները: Երբեք չի վաճառում սեփական կտավը, որովհետև չի ուզում բաժանվել իր խոհերից ու երազներից, իր ստեղծած հեքիաթի աշխարհից: Չի վաճառում, որովհետև անհնար է վաճառել իսկական, մաքուր արվեստը, հոգին, անհնար է փոխարինել այն այլ արժեքներով: Ու թերևս ոչ մի ուժ աշխարհում նրան չի կարող դրդել դավաճանել իր դավանած սկզբունքներին, իր էությանը, ինքն իրեն:
|